د میدان وردګو سیداباد کې کروندګرو ته د غنمو د کرلو روزنه ورکړل شوه
۵ کب ۱۴۰۳ه.ش
۲۴ شَعبان المُعَظّم ۱۴۴۶ه.ق
د میدان وردګو ولایت د سیداباد ولسوالۍ په حیدرخیلو کلي کې کروندګرو ته د غنمو د کرلو په اړه روزنیزه غونډه جوړه شوه. دغه غونډه د کرنیزو خدمتونو د مسوولینو له لوري ترسره شوه، چې په ترڅ کې کروندګرو ته د غنمو او نورو کرنیزو تخمونو د کرلو اړوند مهم معلومات ورکړل شول.
په دې روزنه کې کروندګرو ته د ظرفیت لوړولو، د نوې کرنیزې ټکنالوژۍ د انتقال، د بزګرانو ترمنځ د اړیکو ټینګولو، د عصري کرنې د پراختیا، د نمایشي قطعو د رامنځته کولو، د هرزه بوټو د کنټرول، د کیمیاوي او عضوي سرو د کارونې، د تخم د ژوروالۍ د اندازې، د کرنیزو تخمونو د کرلو د مناسب وخت، د ناروغیو او آفتونو د مخنیوي، د ځمکې د چمتووالي، او د اوبو د تنظیم په برخو کې هر اړخیز معلومات ورکړل شول.
کروندګرو د دې روزنیزې غونډې هرکلی وکړ او له مسوولینو یې غوښتنه وکړه، چې دوی ته دې ورته روزنیزې برنامې دوام ومومي، څو دوی وکولی شي له خپلو کرنیزو ځمکو څخه اعظمي ګټه واخلي.
