د اراضۍ لوی رییس د هلمند ولایت د کرنې رییس سره وکتل
۵ کب ۱۴۰۳ه.ش
۲۴ شَعبان المُعَظّم ۱۴۴۶ه.ق
د کرنې، اوبولګولو او مالدارۍ وزارت د اراضۍ لوی رییس مولوي محمود مظلوم په خپل کاري دفتر کې د هلمند ولایت د کرنې رییس الحاج مولوي نياز محمد وهاج سره وکتل.
په د غه کتنه کې د اراضی لوی ریاست او د هلمند د کرنې رياست د مسؤلینو ترڅنګ د دواړو ریاستونو يو شمېر مسؤلین او تخنيکي کارکوونکو هم شتون درلود.
په پیل کې د اراضۍ لوی رییس د هلمند ولایت د کرنې رییس ته ښه راغلاست ووايه او وروسته له هغه په نومړي ولایت کې د ځمکوالۍ په برخه کې د ياد رياست د اجراآتو په برخه کې خپلې پوښتنې مطرح کړې.
ورپسې د هلمند ولایت د کرنې رییس په دغه ولایت کې د ځمکو په برخه کې خپل د کارونو، اجراآتو او لاسته راوړنو په هکله خبرې وکړې.
نوموړي زیاته کړه د ياد ولايت د کرنې رياست په ځانګړې توګه د اراضۍ څانګې کارکوونکي په ډېر اخلاص، صداقت او له مراجعینو سره په ښه چلند خپلې چارې پر مخ وړي.
همدارنګه د عالیقدر امیرالمؤمنین (حفظه الله تعالی) د حکم د پلي کولو په موخه صنعت او سوداګرۍ وزارت ته د صنعتي پارکونو د جوړولو په پار د زر جريبه ځمکې د تثبيت په برخه کې، چې چارې يې په بشپړه توګه پای ټه ورسېدې او همداراز په دغه ولایت کې د يوشمېر تخنيکي وسايلو د کمښت په برخه کې هم خپل نظر د اراضۍ لوی رییس سره شریک کړ.
په پای کې د اراضۍ لوی رییس مولوي محمود مظلوم د هلمند ولایت د کرنې رییس نه د هغه د زیار او کوښښ څخه په مننې په ټولو برخو کې د هرډول همکارۍ ژمنه وکړه.
