د کابل شکردرې ولسوالی کې د بڼونو خوندیتوب په پار هڅې
۲ کب ۱۴۰۳ه.ش
۲۱ شَعبان المُعَظّم ۱۴۴۶ه.ق
دکابل دکرنې، اوبولګولو او مالدارۍ ریاست ددې ولایت د شکردرې په ولسوالی کې د مېوو بڼونو د خوندیتوب په پار د لایم سلفر درمل کارولو چارې پیل کړي دي.
دشکر درې ولسوالی دکرنې ادارې چارواکي وایي، چې ددې ادارې دکرنیزو چارو کارکوونکو په دې ولسوالی کې د ډول ډول مېوو بڼونو خوندیتوب په پار د لایم سلفر درمل جوړونې او کارونې په موخه لسګونه بزګران روزلي او ترڅنګ یې د دوی د بڼونو ونو ته د لایم سلفر درمل کارونې چارې پیل کړي، چې ورسره تاکونه له فنګسې ناروغیوڅخه خوندي کېږي.
تر دې وړاندې هم د کابل ولایت د استالف او یوشمېر نورو ولسوالیو بڼوالو ته ورته روزنیز پروګرامونه په لاره اچول شوې وه.
باید وویل شي، چې دکرنې وزارت د هېواد په کچه د مېوه لرونکو او بې مېوې ونو د خوندیتوب په پار هلې ځلې کوي، چې په ترڅ کې یې ونې او نیالګي له افتونو او ناروغیو خوندي کېږي.
