پکتیکا کې مالدارانو ته د څارویو خوراکه ووېشل شوه
د پکتیکا ولایت د کرنې، اوبو لګولو او مالدارۍ ریاست د کرنیزو چارو آمریت تر څار لاندې، آر آر اې اې مؤسسې له لوري مالدارانو ته کونجاړه (د څارویو خوراکه) ووېشل شوه.
یاده مرسته د یوې تخنیکي سروې پر بنسټ ترسره شوه، چې له مخې یې مستحق مالداران په نښه شول. دا سروې د اړوندو دولتي ادارو او یادې مؤسسې د مسؤلینو په همغږۍ ترسره شوې وه، ترڅو مرسته مستحقو مالدارانو ته ورسېږي.
مسؤلینو وویل، چې د دې ډول مرستو موخه د مالدارۍ سکتور پیاوړي کول، د څارویو ساتنه او د مالدارانو اقتصادي وضعیت ښه کول دي.
د مرستې ترلاسه کوونکو مالدارانو د کرنې ریاست او همکارې مؤسسې له دې اقدام څخه مننه وکړه او له اړوندو چارواکو یې د ورته نورو مرستو غوښتنه وکړه.
