کندهار کې لسګونه کورنیو ته چرګان او د پالنې لپاره یې اړین توکي ووېشل شول
۳۰ سلواغه ۱۴۰۳ه.ش
۱۹ شَعبان المُعَظّم ۱۴۴۶ه.ق
د کندهار د نېش او میانشین ولسوالیو ۴۲ کورنیو ته چرګان او د پالنې لپاره یې اړین توکي ووېشل شول. دا مرسته د کندهار د کرنې، اوبو لګولو او مالدارۍ ریاست په هڅو، د ملګرو ملتونو د خوراک او کرنې د نړیوال سازمان ایف اې او په مالي ملاتړ او د بشري سرچینو پراختیا ادارې ایچ ار ډي اې په تخنیکي همکارۍ ترسره شوه.
په دې پروګرام کې ۲۱ کورنۍ د نېش او ۲۱ کورنۍ د میانشین له ولسوالۍ شاملې وې، چې هرې کورنۍ ته ۲۷ چرګې، ۳ چرګان، ۴ د اوبو لوښي، ۴ د خوراک لوښي، ۲۰۰ کیلو د چرګانو خوراک او د مرغانچي جوړولو لپاره یوه فلزي دروازه، ۲ کړکۍ او ۵ لرګي ورکړل شول.
د دې مرستې موخه د لیرې پرتو سیمو خلکو ته د چرګانو د پالنې اسانتیا برابرول، د دوی اقتصادي وضعیت ښه کول او د محلي تولید له لارې د خوراکي توکو لاسرسی اسانه کول دي. تمه کېږي چې دا مرسته به نه یوازې د کورنیو عواید لوړ کړي، بلکې د متوازنې تغذیې په برخه کې به هم مرسته وکړي.
د یادونې وړ ده چې تر دې وړاندې هم د بشري سرچینو پراختیا ادارې د ایف اې او په مالي ملاتړ د نېش او میانشین ولسوالیو ۲۲ بزګرانو ته د بڼ جوړونې اړین توکي او تخمونه ورکړي وو.
