کندهار کې لسګونو کورنیو ته د بڼ جوړونې توکي او تخمونه ووېشل شول
د کندهار په میانشین او نېش ولسوالیو کې ۲۰ کورنیو ته د بڼ جوړونې اړین توکي او د سبزیجاتو تخمونه ووېشل شول. دا مرسته د کندهار د کرنې، اوبو لګولو او مالدارۍ ریاست په هڅو، د ملګرو ملتونو د کرنې او خوراک نړیوال سازمان په مالي ملاتړ، د بشري سرچینو پراختیا ادارې ایچ ار ډي اې په تخنیکي همکارۍ او د اړونده ولسوالیو د مسؤلینو تر څار لاندې ترسره شوه.
د مرستې په لړ کې، ۱۰ کورنۍ د میانشین او ۱۰ کورنۍ د نېش له ولسوالۍ شاملې وې، چې هرې کورنۍ ته د کرنیزو وسایلو ترڅنګ د سبزیجاتو بیلابېل تخمونه ورکړل شول، چې پکې د بینډۍ، بانجان، ګندنې، پیاز، رومي، بادرنګ او ملي سرخک تخمونه شامل وو.
همداراز، یادو کورنیو ته د سبزیجاتو د کرکېلې، د اوبو د سپما، د تخم او درمل پاشلو عصري میتودونو، او د سبزیجاتو لپاره د بازار موندنې په برخو کې مسلکي روزنه هم ورکړل شوه.
د دې مرستې موخه د لیرې پرتو ولسوالیو د بزګرانو اقتصادي ملاتړ، په ژمي کې د کاري فرصتونو برابرول، د بزګرانو د مهارتونو لوړول، او کرنیزو فعالیتونو ته وده ورکول دي.
د یادونې وړ ده چې د کندهار د کرنې، اوبو لګولو او مالدارۍ ریاست هڅه کوي، څو د نږدې او لیرې پرتو ولسوالیو بزګرانو ته اړینې اسانتیاوې برابرې کړي، کرنه میکانیزه کړي او بزګرانو ته د عصري کرنې میتودونه وروپېژني.
