جوزجان کې د څړځایونو سروې، تشخیص او تثبت چارې بشپړې شوې 

د کرنې، اوبولګولو او مالدارۍ وزارت د ځمکو چارو لوی ریاست، د طبیعي سرچینو عمومي ریاست او د سرحدونو، قومونو او قبایلو چارو وزارت مسؤلینو او د کرنې وزارت تخنیکي ټیمونو په ګډون جوزجان ولایت کې د څړځایونو سروې، تشخیص او تثبیت چارې بشپړې شوې.
په ياده سروې کې د دغه ولايت د څړځايونو مساحت، د څړځایونو خپل طبیعي حالت، د تصرف نوعيت او همدارنګه د وښو تولیدي ظرفیت او د کوچیانو او مالدارانو د څارويو د تګ او راتګ مسیرونه هم مشخص شول.
یاده سروې د هېواد په شمالي ولایتونو کې د ځمکو د غصب څخه د مخنیوي او غصب شویو ځمکو د استرداد کمیسیون په لارښوونه پیل، چې تر دې دمه په فاریاب او جوزجان ولایتونو کې پای ته رسیدلې او په بلخ ولایت کې هم چارې يې د بشپړېدو په حالت کې دي.
د دغه سروې د ختمېدو سره به په راتلونکي کې د يادو ولاياتو د څړځایونو ستونزو ته لاره همواره او اجراآت به يې په چټکۍ سره سرته ورسېږي.
د يادونې وړ ده، چې نوموړې سروې د يادو ادارو د فني او تخنیکي کارمندانو لخوا په مسلکي توګه ترسره شوې ده.