د کندهار پنجوایې کې د ۳.۸ میلیونه افغانیو په لګښت د استنادي دېوال رغنیزې چارې پیل شوې
۲۱ سلواغه ۱۴۰۳ه.ش
۱۰ شَعبان المُعَظّم ۱۴۴۶ه.ق
د کندهار د کرنې، اوبولګولو او مالدارۍ ریاست چاراکي وایي، چې د یاد ریاست د پراختیایې بودیجې له لارې ددې ولایت د پنجوایې ولسوالی د بدوان په سیمه کې د ۳.۸ میلیونه افغانیو په لګښت د استنادي دېوال رغنیزې چارې پیل شوي دي.
دغه دېوال چې ۲۶۵ متره اوږدوالې، ۱.۵ متره پراخوالې او ۳ متره جګوالې ولري، چې د دوو میاشتو په اوږدو کې به یې رغنیزې چارې بشپړ او ګټې اخیستنې ته به وسپارل شي.
د کندهار دکرنې ریاست د چارواکو په خبره د یاد دېوال د رغنیزو چارو په ترڅ کې اتو کسانو ته په فني او ۵۰ کسانو ته په غیرفني ډول د کار زمینه برابره شوې ده او ترڅنګ یې د کارونو د ښه ترسراوی په موخه د مؤثره ماشینري څخه هم ګټه پورته کېږي.
دغه استنادي دېوال د ارغنداب ولسوالی له رود څخه د پنجوایې ولسوالی د بدوان ویالۍ ژغورل او ساتنه، د پنجوایې ولسوالی بزګرانو او مالدارانو ستونزه په اساسي او دوامداره توګه حلول او اوبو اسانتیاوې رامنځته کولو په موخه جوړېږي.
په ورته وخت کې، د پنجوایې ولسوالی ځایې اوسېدونکي د کندهار د کرنې ریاست څخه خوښي څرګندوی، چې د اوبو رسولو په موخه ورته اسانتیاوې برابرېږي، چې ورسره سم به د دوی ډېرې ستونزې هوارې شي.
د یادونې وړ ده چې موده مخکې هم د کندهار د کرنې ریاست په هڅو او د ملګروملتونو د پراختیایي پروګرام (یو. ان. ډې. پي) په مالي ملاتړ، د کندهار دخاکریز په ولسوالی کې د ۱۱۰ زره امریکایې ډالرو په ارزښت د اوبو رسولو کانال د جوړېدو چارې پیل شوې وې.
