د کندهار نېش کې اړمنو بزګرانو ته د مېوو بڼونه جوړېږي 

۱۳ سلواغه ۱۴۰۳ه‍.ش
۳ شَعبان المُعَظّم ۱۴۴۶ه‍.ق
د کندهار کرنې، اوبو لګولو او مالدارۍ ریاست په مشرۍ، د ملګرو ملتونو پراختیایي پروګرام (یو ان ډي پي) په مالي ملاتړ، د سولې بنسټ مؤسسې په تخنیکي همکارۍ او د کرنیزو چارو آمریت تر څارنې لاندې، د کندهار نېش ولسوالۍ کې د تازه مېوو بڼونه جوړېږي. د یادې پروژې د عملي کېدو لپاره سروې بشپړه شوې او تمه ده چې د بڼونو جوړولو چارې به راتلونکې میاشت پیل شي.
د معلوماتو له مخې، په دې بڼونو کې به انځر، بادام، انګور، انار او نورې مېوې شاملې وي، چې موخه یې د کرنې سکتور پراختیا، د تازه مېوو تولید زیاتوالی، د بزګرانو اقتصادي ملاتړ او د بېوزلو خلکو لپاره د کار زمینې برابرول دي.
د کرنې ریاست مسئولین وايي، چې تېر کال هم په نېش ولسوالۍ کې د بېلابېلو سازمانونو له لوري ورته بڼونه جوړ شوي وو او سږ کال به د نورو اړمنو بزګرانو لپاره هم د مېوو بڼونه په اساسي ډول جوړ شي.