د ننګرهار خوږیاڼو کې د دوه میلیونه افغانیو په لګښت د اوبو زېرمه کولو واټرشېډ جوړولو چارې پیل شوې

۱۳ سلواغه ۱۴۰۳ه‍.ش
۳ شَعبان المُعَظّم ۱۴۴۶ه‍.ق
د ننګرهار د کرنې، اوبو لګولو او مالدارۍ ریاست په هڅو د خوږیاڼو ولسوالی خوازه خېلو کمبو سیمه کې د دوه میلیونه افغانیو په لګښت د سیلابي اوباراني اوبو زېرمه کولو یا واټر شېډ رغنیزې چارې پیل شوې.
د ننګرهارد کرنې، اوبو لګولو او مالدارۍ رییس مولوي محمد ولي محسن وویل، چې د اسلامي هوسایني نړۍوالې مؤسسې له لورې په خوږیاڼو ولسوالۍ کې د واټرشېډ جوړېدو چارې پیل شوي، چې پدې پروژه کې به کوچنی چکډېمونه د اوبو د سرعت کمولو او اوبو زېرمه کولو لپاره جوړشي او ترڅنګ یې درې کیلو متره کانال پاک کاري او د کانال په شاوخوا کې ۵۰۰۰ بې مېوې نیالګیو  کښېنول هم شامل دي.
د اسلامي هوسایني نړۍوالې مؤسسې مسؤل عبدالکریم ناصح وویل، چې یاده پروژه به د دوو میاشتو په موده کې بشپړه شي، چې د سیمې لسګونو خلکو ته به د کار زمینه هم برابره شي.
د یادو پروژو جوړولو موخه د اوبو ښه مدیریت او د ځمکي لاندې اوبو تاندول دي.