د خوست باک ولسوالی کې د کبانو او چرګانو فارمونو څخه لیدنه وشوه
۱۳ سلواغه ۱۴۰۳ه.ش
۳ شَعبان المُعَظّم ۱۴۴۶ه.ق
د خوست دکرنې، اوبولګولو او مالدارۍ ریاست د حیواني روغتیا مدیریت پلاوی ددې ولایت د باک په ولسوالی کې د کبانو او چرګانو له شته فارمونو څخه د لیدنې په ترڅ کې د یادو فارمونو چارواکو ته اړینې سپارښتنې وکړې.
د خوست دکرنې ریاست چارواکي وایي، چې ددې لېدنې په ترڅ کې د فارمونو مسوولینو ته د چرګانو او کبانو د تغذیې او خوراکي توکو برابرولو په هکله اړینې سپاښتنې شوې.
په همدې حال د یادو فارمونو مسوولین د خوست دکرنې ریاست له چارواکو څخه د کبانو او چرګانو د خوراکي توکو په برخه کې د همکارۍ غوښتنه وکړه، چې دوی ته د هراړخیزې همکارۍ ډاډ ورکړل شو.
خوست یو له هغو ولایتونو څخه دی، چې په دې وروستیو کې په دې ولایت کې د کبانو او چرګانو ډېر فارمونه فعال شوي دي، په همدې موخه دخوست د کرنې ریاست هلې ځلې کوي، چې ددې ولایت د فارملرونکو ستونزې هوارې او په دې ولایت کې د مالدارۍ صنعت ودې او پراختیا ته زمینه برابره کړي.
