د هلمند نوزاد کې د نخودو او کچالو د کرکیلې دودولو په پار هڅې
۱۱ سلواغه ۱۴۰۳ه.ش
۱ شَعبان المُعَظّم ۱۴۴۶ه.ق
دهلمند ولایت د کرنې، اوبولګولو او مالدارۍ ریاست لخوا په نوزاد ولسوالی کې د نخودو او کچالو د کرکېلې دودولو په پار هڅې پیل شوي دي.
په همدې موخه د یادې ولسوالی ١٥ تنو کرونده ګرو ته د کرنې مسؤلینو لخوا، د نخودو او کچالو تخمونه، توره او سپینه سره ووېشل شوه، ترڅو یاد بزګران په خپلو ځمکو کې دغه کرکېله ترسره کړي او د سیمې نور بزګران هم ورڅخه زده کړې ترلاسه کړي.
ددغو مرستو په لړ کې هر بزګر ته ٢٠ کیلو د نخودو تخم، ٥٠ کیلو سپینه او ٢٥ کیلو توره سره، همدارنګه ٥ تنو بزګرانو هر یوه ته ٤٠٠ کیلوګرامه د کچالو تخم، ٥٠ کیلو سپین او ٢٥ کیلو توره سره ورکړل شوي، چې مالي همکاري یې د ډاکار مؤسسې په غاړه ده.
په ورته وخت کې یادو بزګرانو ددغه ډول مرستو څخه خوښي وښوده او په راتلونکي کې یې هم د لا زیاتو همکاریو غوښتنه وکړه.
