د پکتیکا زیړوک کې د مېوو او سبو د لمریزو وچوونکو ماشینونو وېش
۲۹ مرغومې ۱۴۰۳ھ.ش
۱۸ رَجَب المُرَجَّب ۱۴۴۶ه.ق
د پکتیکا ولایت په زیړوک ولسوالۍ کې د کرنې ریاست په همغږۍ، د کلیو بیارغونې مووسسې له لوري ۲۵۰ مستحقو بزګرانو ته د مېوو او سبو لمریز وچوونکي ماشینونه د مسلکي کارکوونکو له ارزونې وروسته ووېشل شول. دا مرسته د یوې سروې پر بنسټ ترسره شوه، چې تر دې وړاندې د اړوندو ادارو او مووسسې د چارواکو په همغږۍ ترسره شوې وه.
د کرنې ریاست چارواکي وایي، دغه مرستې د کرنې سکتور د پیاوړتیا او د بزګرانو اړتیاوو د پوره کولو په موخه وېشل شوي دي. دوی هیله څرګنده کړه چې د دې ماشینونو وېش به د بزګرانو اقتصادي وضعیت ښه کولو کې اغېزمن تمام شي.
د مېوو او سبو وچوونکي ماشینونه د کرنې په سکتور کې د نوې ټکنالوژۍ د کارولو یوه مهمه برخه ګڼل کېږي، چې د کرنیزو محصولاتو د ضایع کېدو مخنیوی کوي او د بزګرانو لپاره د عاید سرچینې پراخوي.
