د کندهار ریګستان کې پاکستان ته د شملغې بوټو د قاچاق مخه ونیول شوه
۱۰ مرغومې ۱۴۰۳ه.ش
۲۸ جُمَادَى الثاني۱۴۴۶ه.ق
د کندهار د کرنې، اوبو لګولو او مالدارۍ ریاست چارواکي وایي، چې د سرحدي ریګستان ولسوالی د کرنې او مالدارۍ مسؤلینو د یادې ولسوالۍ په بېلابېلو سیمو کې د طبیعي بوټو د ساتنې او پرېکولو د مخنیوي په موخه کمپاین ترسره کړ، چې په ترڅ کې یې د کاروان راه په سیمه کې د شملغې ځنګلي بوټو د قاچاق مخه ونیول شوه. مسؤلین زیاتوي چې یو تن غوښتل یاد بوټي پاکستان ته په قاچاقي ډول انتقال کړي، خو پر وخت یې مخه ونیول شوه.
د ریګستان ولسوالی د کرنې او مالدارۍ چارواکي وایي، چې دا کمپاین د یوې ورځې په اوږدو کې د ولسوالۍ په بېلابېلو ځنګلي او طبیعي بوټو لرونکو سیمو کې ترسره شوه، چې د یاد کمپاین په ترڅ کې د کاروان راه په سیمه کې د شملغې طبیعي بوټو پاکستان ته د قاچاق مخه ونیول شوه، او په تړاو یې یو عراده سیپا موټر او یو تن نیول شوی دی.
د یادونې وړ ده، چې د کندهار د کرنې ریاست په دې وروستیو کې د طبیعي بوټو د قاچاق او پرېکولو د مخنیوي لپاره ګڼ کمپاینونه ترسره کړي، چې په ترڅ کې یې دوه اوونۍ وړاندې هم په کندهار ښورابک ولسوالۍ کې د شملغې بوټو د قاچاق مخه نیول شوې وه.
