ننګرهار کې د مالټو حاصلات ډېر شوي

۲۰ لېندۍ ۱۴۰۳ه‍.ش
۹ جُمَادَى الثاني۱۴۴۶ه‍.ق
د ننګرهار د کرنې، اوبولګولو او مالدارۍ ریاست چارواکي وایي، چې سږ کال د دې ولایت د مالټو حاصلات د تېرکال په پرتله ډېر شوي دي. 
د ننګرهار د کرنې، اوبولګولو او مالدارۍ رییس مولوی محمد ولي محسن وویل، چې دکرنې ریاست او همکارو مؤسساتو له لورې د ننګرهار په ۱۷ ولسوالیو ګوشته،کامه، کوزکنړ، دره نور، سره رود، شیرزاد، خوږیاڼو، چپرهار، رودات، کوټ، بټي کوټ، بهسود، غني خېل،مومندره، لعلپوره، اچین او نازیانو  کې پر ۲ زره او ۷۵۳ جریب ځمکه د مالټو بڼونه جوړ شوي دي، چې له دغو بڼونو څخه به داټکل له مخې سږ کال  ۱۱ زره او ۱۳ ټنه حاصل ترلاسه شي.
ښاغلي محسن وویل، چې تېر کال پر ۲ زره او ۵۰۳ جریبه ځمکه د مالټو بڼونه جوړ شوي وو؛ چې ۱۰ زره او ۹۶۸ مټریک ټنه حاصل یي ورکړي وو.
د ننګرهار دکرنې رییس زیاته کړه، چې د ننګرهار اقلیمي شرایط د ستروسو کرلو ته مناسبه ده نو په راتلوونکي کې د ننګرهار په بېلابېلو ولسوالیو کې  دمالټو سل جریبه ننداریزې قطعو جوړولو پلان لرو.
د مالټې د دغو بڼونو جوړولو موخه هېواد د سټروسو مېوو له اړخه پر ځان بسیا کول او په ټوله کې د سټروسو بڼونو ترویج او خلکو ته د کار زمینه برابرول دي.
د افغانستان ختیځ ننګرهار، لغمان او کونړ ولایتونه مدیتراني اقلیم او د مالټو، نارنج او لیمو بڼونو لپاره مناسبه هوا لري، چې هر کال له یادو ولایتونو څخه په زرګونه ټنه د سټرسو حاصلات راټولېږي.