د کندهار څېړنیز فارم کې د غنمو د مورني نسلونو څېړنې پیل شوې
د کندهار د کرنې، اوبو لګولو او مالدارۍ ریاست تر مشرۍ لاندې د کوهکران څېړنیز فارم کې د غنمو د مورني نسل (بریډر) ۷ ډوله ورایټیو کرنیزې څېړنې په رسمي ډول پیل شوې.
د دې څېړنو چارې به د فارم انجینرانو او مسؤلینو له لوري د ۱۰ جریبه ځمکې پر ساحه ترسره کېږي، چې موخه یې د غنمو له هر اړخه څېړل او ګټورو ورایټیو موندل دي. ټاکل شوې ده، چې د دغو ورایټیو حاصل وروسته خصوصي شرکتونو ته وسپارل شي. شرکتونه به یې د قرارداد له مخې بزګرانو ته ووېشي، ترڅو په کندهار کې اصلاح شوې ورایټۍ دود شي او بزګران له دې پرمختګ څخه ګټه واخلي.
یادونې وړ ده چې څو ورځې وړاندې په کوهکران څېړنیز فارم کې د یو نیم جریب ځمکې په ساحه کې د انتریو یا غیرې نومول شوو ورایټیو څېړنې هم پیل شوې وې.
د دې څېړنو موخه د کرنې سکتور پراختیا او بزګرانو ته د اصلاح شویو غنمو چمتو کول دي، چې د کرنې د ښه کېدو ترڅنګ به د غلې حاصلات هم لوړ کړي.
