د فراه دوو ولسوالیو کې د ټرایکوډرما قارچونو پروګرام پای ته ورسېد
۶ لېندۍ ۱۴۰۳ه.ش
۲۴ جُمَادَى الأول ۱۴۴۶ه.ق
د کرنې، اوبو لګولو او مالدارۍ وزارت په لارښونه، د فراه د کرنې، اوبو لګولو او مالدارۍ ریاست په تخنیکي همکارۍ، د بوټو ساتنې او قرنطین عمومي مدیریت مسلکي کارکوونکو په ملتیا او د کرنې، اوبو لګولو او مالدارۍ وزارت د بوټو ساتنې او قرنطین ریاست د پلاوي له لوري د فراه ولایت د خاکسفید او بالابلوک ولسوالیو په بېلابېلو سیمو کې د ټرایکوډرما ګټور قارچونو د استعمال او تطبیق پروګرام پای ته ورسېد.
یاد پروګرام د کرنې وزارت د بوټو ساتنې آمریت استازی خواجه موسی صدیقیي په مشرۍ او د کرنې ریاست او یادو ولسوالیو د کرنې او مالدارۍ مسؤلینو په همغږۍ پیل شوې وه. چې په ترڅ کې یې بزګرانو او بڼوالو ته وښودل شوه، چې څنګه د ټرایکوډرما ګټور قارچونه د نباتي ناروغیو او آفتونو په مخنیوي کې استفاده کړي، ترڅو د نباتي افت وژونکو کیمیاوي درملو استعمال کم کړي او د خپلو محصولاتو لپاره یو سالم او پایدار چاپېریال رامنځته کړي.
د پروګرام په لړ کې، ټرایکوډرما په عملي ډول په بڼونو او ځمکو کې د بزګرانو او بڼوالو په حضور کې وکارول شو. بزګرانو ته د دې ګټورو قارچونو د استعمال طریقې وښودل شوې، او هغوی ته وښودل شوه، چې څنګه دا ګټور قارچونه په ځمکو او بڼونو کې د ناروغیو په مخنیوي کې مرسته کوي. د ټرایکوډرما کارول بزګرانو ته د دې فرصت برابروي چې په طبیعي توګه د خپلو کروندو حاصلات خوندي کړي او د ناروغیو او آفتونو زیان راکم کړي.
د یاد پروګرام څخه موخه د کرنیزو درملو بدیل کروندګرو ته څرګندول، په حاصلاتو کې زیاتوالي، د یاد قارچونو په پار عامه پوهاوی، د چاپېریال ککړتیا ته پاملرنه، د کروندګرو سره په یاده برخه کې مرسته کول او کروندګرو ته په کم بیه سره کټور درمل ښودل وه.
په ورته وخت کې د یادو ولسوالیو بڼوال او بزګران هم زیات خوښ دي، چې د کرنې وزارت له لوري ورته داسې پروګرامونه دائرېږي او دوی ته په یاده برخه کې پوهاوی ورکول کېږي.
