د لغمان الینګار کې د عشر او زکات عامه پوهاوي ناسته ترسره شوه
د لغمان ولایت کرنې، اوبولګولو او مالدارۍ ریاست د الینګار ولسوالی د عشر او زکات مسؤلینو د کشردکاه سیمې قومي مشرانو او علمای کرامو سره د عشر او زکات په اړه د عامه پوهاوي ناسته وکړه.
په دې ناسته کې د عشر مدیر نورالله حنفي د اسلامي شریعت په رڼا کې د عشر او زکات د ورکړې اهمیت تشریح کړ او د امیرالمؤمنین حفظه الله حکم یې ولوست. نوموړي د سیمې قومي مشرانو او علمای کرامو څخه وغوښتل چې د عشر د عاملینو سره د دې چارې د ترسره کولو پر مهال همکاري وکړي. چې قومي مشرانو او علمای کرامو د پوره ملاتړ او همکارۍ ډاډ ورکړ.
له ناستې وروسته، د عشر د راټولولو مسؤلین سیمې ته لاړل او هلته یې د وریجو د فصل د عشر راټولولو بهیر څارنه وکړه. هغوی عاملینو ته سپارښتنه وکړه چې له ولسونو سره د عشر د ورکړې پر مهال ښه چلند وکړي.
د عشر او زکات راټولول د اسلامي شریعت له مهمو احکامو څخه دي، چې د ټولنې د بېوزلو اړتیاوو د پوره کولو لپاره ځانګړې کېږي. د لغمان کرنې ریاست په دې برخه کې د عامه پوهاوي ناستې ترسره کوي، ترڅو د ولسونو همکاري ترلاسه او دا بهیر په اغېزناک ډول ترسره شي.
