په فراه کې پر سلګونو بزګرانو کیمیاوي سره ووېشل شوه
د فراه ولایت پشت رود ولسوالۍ کې ۱۲۹ بزګرانو ته کیمیاوي سره ووېشل شوه. دا مرسته د فراه د کرنې، اوبولګولو او مالدارۍ ریاست په همغږۍ، د (آر، او، پي) موسسې په تخنیکي همکارۍ او د (یو، ان، ډي، پي) په مالي ملاتړ ترسره شوه.
د دې لړۍ په ترڅ کې هر بزګر ته ۵۰ کیلوګرامه سپینه سره او ۲۵ کیلوګرامه توره سره ورکړل شوه. د دې تر څنګ، څه موده مخکې یادو بزګرانو ته د پیازو اصلاح شوي تخمونه هم وېشل شوي وو.
د دې مرستو موخه په سیمه کې د اصلاح شویو تخمونو دودول، د بزګرانو ملاتړ او له محدودو ځمکو څخه د زیاتو حاصلاتو ترلاسه کول دي.
د سیمهییزو چارواکو په وینا، د دې ډول مرستو دوام به د کرنې د ودې او د بزګرانو د اقتصادي وضعیت د ښه کېدو لپاره اړین وي.
