لغمان کې د عشر راټول شوي غنم، جوار او چهارمغز رڼې بولۍ له لارې وپلورل شول

د لغمان د کرنې، اوبولګولو او مالدارۍ ریاست د عشر راټول شوي ۲زره او ۳۳ منه غنم، ۵۰۰ منه جوار او ۲۶ منه چهارمغز، چې د الیشنګ ولسوالۍ د عشر مسؤلینو له لوري د عشر مستحقینو څخه راټول شوي وو، د یوې رڼې بولۍ (داوطلبۍ) له لارې وپلورل شول.
د پلور په دې پروسه کې د عشر او زکات راټولولو امر قاري ذبیح الله هشام، د عوایدو محاسبې امر، د مالونو او اجناسو د تسلیم‌ګیرۍ مدیر عبدالرحمن او د استخباراتو، امنیه قوماندانۍ او ولسوالۍ استازو ګډون درلود.
د عشر او زکات راټولولو امر قاري ذبیح الله هشام د مختلفو ادارو استازو ته په دې پروسه کې د قانوني کړنو ترسره کولو، روڼتیا، او د اصولو مراعتولو په اړه لازمې سپارښتنې وکړې.
په بولۍ کې بېلابېلو داوطلبانو برخه اخیستې وه، چې له ډلې یې درې هغه داوطلبان، چې د لوړ نرخونو وړاندیزونه یې د بولۍ له اصولو سره سم وو، د ګډ هیئت له لوري بریالي اعلان شول.
د یادو غنمو، جوارو او چهارمغزو د پلور له لارې ۳۸۱زره او ۶۵۰ افغانۍ عواید ترلاسه شول، چې اړوند بانکي حساب ته به تحویل شي.