د کندهار څېړنیز فارم کې د ټیکا په مالي ملاتړ پر ۵۰۰ جریبه ځمکه د تیلي او صنعتي نباتاتو کرنه پیل شوه

د کرنې، اوبو لګولو او مالدارۍ وزارت د مسلکي مرستیال مولوي صدراعظم عثماني په لارښوونه، د کندهار د کرنې ریاست په تخنیکي ملاتړ او د ترکیې ټیکا کمپنۍ په مالي همکارۍ، په کندهار نوروزي څېړنیز فارم کې پر ۵۰۰ جریبه ځمکه د تیلي او صنعتي نباتاتو کرنه پيل شوې ده.
په تېرو کلونو کې د ترکیې ټیکا کمپنۍ د څیړنې په موخه کندهار، ننګرهار، کابل او پروان ولایتونو ته د یو شمېر تیلي او صنعتي نباتاتو تخمونه ویشلي وو، چې وروسته یې د کندهار په شرایطو کې مثبته نتیجه ورکړه. دغه پایله له ټیکا سره شریکه شوه، او ټیکا کمپنۍ هم د دې پروژې پراختیا ته هیله مندي وښوده.
په همدې اساس، ټیکا کمپنۍ پرېکړه وکړه چې د کندهار په نوروزي څیړنیز فارم کې پر ۵۰۰ جریبه ځمکه د تیلي او صنعتي نباتاتو کرنه وکړي. د دې کرنې لپاره په نوروزي فارم کې کافي ځمکه شته او د ټیکا استازي به په دغه فارم کې د نباتاتو کرنې او پراختیا لپاره فعالیت کوي، چې ورسره ګڼو کسانو ته د کار فرصتونه هم برابریږي.
د دې ترڅنګ، د تیلي او صنعتي نباتاتو تخمونه به د لوی کندهار زون بزګرانو ته ووېشل شي، څو په خپلو ځمکو کې د دې نباتاتو کرنه دود کړي. د دې نباتاتو حاصلات به وروسته د غوړیو تولید لپاره کارخونو ته وړاندې شي، چې له پروسس وروسته به وطني غوړي بازار ته وړاندې شي. دغه ګام به د بهرنیو غوړیو اړتیا کمه او د وطني تولیداتو وده پیاوړې کړي.