بغلان کې ۶۰۰ بزګرانو ته د غنمو اصلاح شوی تخم او سره ووېشل شوه
۲۴ لړم ۱۴۰۳ه.ش
۱۲ جُمَادَى الأول ۱۴۴۶ه.ق
د بغلان ولایت فرنګ ولسوالی کې ۶۰۰ بزګرانو سره د غنمو اصلاح شوي تخم، تورې او سپینې سرې مرسته وشوه. دا مرستې د ملګرو ملتونو د خوړو او کرنې ادارې په مالي ملاتړ او د اکټیډ مؤسسې په تخنیکي همکارۍ چمتو شوي، چې د کرنیزو چارو عمومي مدیریت کارکوونکو د ولسوالۍ مسوولینو او مؤسسې استازو په شتون کې ووېشل شوې.
یادې مرستې هغو بزګرانو ته وېشل کېږي، چې د ۲ تر ۵ جریبه ځمکه لري، اقتصادي وضعیت یې کمزوری دی او د تخم او سرې د پېرلو وس نه لري. په دې مرستو کې هر بزګر ته ۵۰ کیلوګرامه د غنمو اصلاح شوی تخم، ۵۰ کیلو سپینه او ۵۰ کیلو توره سره ورکړل شوه.
د دې مرستې موخه په فرنګ ولسوالی کې د اصلاح شویو تخمونو دودول، د بزګرانو او ځمکوالو ملاتړ او له کمو ځمکو څخه د زیاتو حاصلاتو ترلاسه کول دي.
