ننګرهار کې به اړتیا ته په کتو د څارویو په برخه کې پروژې ډیزاین او پلي کېږي

۲۱ لړم ۱۴۰۳ه‍.ش
۹ جُمَادَى الأول ۱۴۴۶ه‍.ق
د ننګرهار د کرنې، اوبو لګولو او مالدارۍ رییس مولوي محمد ولي محسن د افغانستان لپاره د هالنډ کمېټې داجرایوي رییس ډاکټر چالچو نیګوس اګونافیر، د یادې کمېټې د د بورډ غړی داکتر ابرام یمرزل، دهمدې دفتر د بهرنیو اړیکو سلا کار داکتر رایمون بریسکو، د پروګرامونو مسؤل داکتر فریدون قیومي او ولایتي مسؤلینو سره په ننګرهار کې د هالینډ کمېټې د لاسته راوړنو، ستونزو او راتلوونکي پروګرامونو دهمغږۍ په پار ناسته ترسره کړه.
ددې ناستې په ترڅ کې ډاکټر ابرام یمرزل د ننګرهار د کرنې رییس د همکارۍ او غوره همغږۍ څخه مننه وکړه او هم یې په ننګرهار کې د خپلو ترسره کړو تطبیق کړو پروژو خوښ وښوده.
نوموړې وویل، چې دوی غواړي په ننګرهار کې دمالدارۍ په سکتور کې د کرنې ریاست سره په همغږۍ اړتیا ته په کتو خپلې پروژې ډیزاین او پلي کړي.
هغه وویل موږ پر هغو پروژو کار کوو چې د مالدارۍ سکتور دپیاوړتیا سربېره خلکو ته د کار زمینه هم برابره شي.
د ننګرهارد  کرنې، اوبو لګولو او مالدارۍ رییس مولوي محمد ولي محسن د هالینډ کمېټې له کړنو خوښي وښوده او ا.ا.ا د نافذه قوانینو په رڼا کې د هر راز همکارۍ او همغږۍ ډاډ څرګند کړ.
ښاغلي محسن په ننګرهار کې د طبق، پوستکو ددانو ناروغۍ، طاعون، لیوني سپي ناروغیو واکسینونو، شېدو مرکزونو، د څارویو د درملنې  کلینیکونو جوړولو، د مرکزي لابراتوار تخنیکي وسایلو مرسته او د کارکوونکو د ظرفیت لوړونې په برخه کې د همکاریو غوښتنه وکړه.