ننګرهار کې سلګونو بزګرانو ته د غنمو اصلاح شوي تخم، کیمیاوي سرې او کرنیز وسایل ووېشل شول
۱۹ لړم ۱۴۰۳ه.ش
۷ جُمَادَى الأول ۱۴۴۶ه.ق
د ننګرهارد کرنې، اوبو لګولو او مالدارۍ ریاست سره په همغږۍ د بشري خیریه موسسې له لورې په اچین، سپین غر، لعلپوره او مهمندرې ولسوالېو کې ۴۱۷ بزګرانو سره د غنمو اصلاح شوي تخم، کیمیاوی سرو او کرنیزو وسایلو مرسته وشوه.
د ننګرهار د کرنې، اوبو لګولو او مالدارۍ رییس مولوی محمد ولي محسن وویل، چې بشري خیریه موسسې هر بزګر ته ۲۵ کیلو اصلاح شوي غنم تخم، ۲۵ کیلو توره، ۵۰ کیلو یوریا سري، بېلچه، پنجي، لور، رمبی او موزې ورکړل شوي.
ښاغلي محسن وویل، چې څو ورځې وړاندې د ملګرو ملتونو د کرنې او خوړو ادارې له لوري هم زرګونه بزګرانو ته اصلاح شوي غنمو تخم او کیمیاوی سرو وېش لړۍ پیل شوه.
د بشري خیریه مؤسسې دکرنې برخې مسؤل انجنیر هدایت الله ثنایي وویل، چې په نږدې ورځو کې یادو بزګرانو ته غنمو کرلو، اوبو لګولو، سرې استعمال، هرزه وښو کنټرول، ناروغیو مخنیوی، حاصل ټولولواو نورو اړونده برخو کې روزنه هم ورکول کېږي.
