د خوست د ځنګلونو ساتنې او بیا رغونې کمېټې د تڼیو او نادرشاه کوټ ولسوالیو ته سفر وکړ
۱۲ لړم ۱۴۰۳ه.ش
۳۰ رَبِیعُ الْثاني ۱۴۴۶ه.ق
د خوست د ځنګلونو ساتنې او بیا رغونې کمېټې غړیو، د کمېټې د رییس په شمول، د قلندر او موسی خېلو ولسوالیو له سفر وروسته، تڼیو او نادرشاه کوټ ولسوالیو ته سفر وکړ. د کمېټې لومړنی سفر تڼیو ولسوالۍ ته وو، چې پکې د ولسوالۍ د ولسوال او ګڼو قومي مشرانو ترڅنګ د ولسوالۍ ملکي او نظامي کارکوونکي هم حاضر وو.
په تڼیو ولسوالۍ کې د کرنې رییس د غونډې ګډونوالو ته د کمېټې موخې او د ځنګلونو ارزښت په اړه تفصیلي خبرې وکړې. ورپسې قومي مشرانو په خپل وار خبرې وکړې او د خپلې سیمې ستونزې یې له کمېټې سره شریکې کړې.
له دې وروسته کمېټې نادرشاه کوټ ولسوالۍ ته سفر وکړ، چې پکې د ولسوالۍ ټول قومي مشران او د ولسوال صاحب په ګډون ګڼ مشران او کارکوونکي موجود وو. د خوست د کرنې او مالدارۍ رئیس د کمېټې د سفر موخې او د ځنګلونو د ساتنې او بیا رغونې اړوند پلانونه له خلکو سره شریک کړل. قومي مشرانو د کمېټې غړیو ته د ښه راغلاست ترڅنګ د خپلو سیمو ستونزې او غوښتنې بیان کړې.
د دواړو ولسوالیو قومي مشرانو او علماؤ کرامو کمېټې ته ډاډ ورکړ چې د ځنګلونو ساتنې او بیا رغونې په برخه کې به په پوره ژمنتیا همکاري کوي. د سفر په پای کې کمېټې د شنمباوت د لرګیو لویې اډې څخه هم لیدنه وکړه، چې له درې زره خرواره څخه زیات د ځنګل لرګي پکې موجود وو.
