د کندهار په پنجاو کې د اوبو رسولو کانال د جوړولو چارې روانې دي
۷ لړم ۱۴۰۳ه.ش
۲۵ رَبِیعُ الْثاني ۱۴۴۶ه.ق
د کندهار د کرنې، اوبو لګولو او مالدارۍ ریاست د پنجاو کانال د جوړېدو چارې د یو ان ډي ایف سازمان په مالي ملاتړ، د سولې بنسټ مؤسسې په تخنیکي همکارۍ او د کندهار د طبیعي سرچینو آمریت تر مستقیمې څارنې لاندې پیل کړې دي.
د کندهار کرنې، اوبو لګولو او مالدارۍ ریاست په هڅو، د پنجاو کانال د جوړېدو چارې دوه اوونۍ وړاندې د یو ان ډي ایف سازمان په مالي ملاتړ، د سولې بنسټ مؤسسې په تخنیکي همکارۍ او د کندهار د طبیعي سرچینو آمریت تر مستقیمې څارنې لاندې پیل شوې. دا کانال د کندهار کرنیزو ځمکو او باغونو د اوبو لګولو په موخه جوړېږي، چې د سیمې د زرګونو بزګرانو لپاره د اوبو د دوامداره او خوندي لاسرسي په برخه کې یو مهم پرمختګ بلل کېږي.
د کندهار د طبیعي سرچینو آمریت انجینرانو د کانال د پروژې د پرمختګ او کیفیت د ارزونې په موخه د پروژې ساحې څخه څارنه وکړه. د څارنې پر مهال، د کانال د جوړېدو پر بهیر هر اړخیزه کتنه وشوه او د انجینرانو له لوري د پروژې د لا ښهوالي او کیفیت لوړولو لپاره مهمې سپارښتنې وړاندې شوې.
د پنجاو کانال پروژه چې ټولټال ۸۵۵ زره امریکايي ډالر لګښت پرې راځي، په درېیو میاشتو کې به بشپړه شي. دا کانال د ۴ کیلومترو په اوږدوالي، ۴ مترو په پراخوالي او ۱.۵ مترو په لوړوالي جوړېږي او د څلورو خصوصي ساختماني شرکتونو له لوري پر مخ وړل کېږي. د پروژې په فني او غیرفني چارو کې ۳۵۰ کسانو ته د کار زمینه برابره شوې ده.
د پنجاو کانال جوړول د کندهار په بېلابېلو سیمو کې د اوبو رسولو سیستم کې د پام وړ ښهوالی راولي، چې له دې لارې به د کروندګرو او باغ لرونکو د اوبو اړتیاوې پوره شي او د کرنې او مالدارۍ په برخه کې د کندهار ولایت د پرمختګ لپاره حیاتي رول لوبوي.
