لوګر کې سلګونه اړمنو کاریګرو ته د کار زمینه برابره شوه

۱۶ تله ۱۴۰۳ه‍.ش
۴ رَبِیعُ الْثاني ۱۴۴۶ه‍.ق
د لوګر د کرنې، اوبولګولو او مالدارۍ ریاست وایې، چې د ۱۹ میلیون افغانیو په مالی ارزښت لوګر کې سلګونه اړمنو کاریګرو ته د کار زمینه برابره شوې.
دغه پروژې چې ۱۲۰۰ اړمنو کاریګرو ته پکې د کار زمینه برابره شوې ده د لوګر  د کرنې، اوبولګولو او مالدارۍ ریاست له لوري د ملګرو ملتونو دخوړو او کرنې نړۍوالی ادارې په مالي او د افغانستان لپاره د راتلونکو نسلونو مؤسسې په تخنیکي همکارۍ د دغه ولایت مرکز پُل علم په ګډون محمدآغه، څرخ او برکي برک ولسوالیو کې پلي کېږي، چارې یې رسماً د مسؤولینو او قومي مشرانو په شتون کې پيل شوې.
په همدې موخه جوړه شوې غونډه کې چې دلوګر ولایت د مرکز پُل علم اړوند پادخواب شانې کلی کې جوړه شوې وه  پکې د لوګر د کرنې او مالدارۍ رییس مولوی عبدالرؤف سعید سربېره د طبیعي سرچینو او عوایدو آمرینو قومي مشرانو او د پروژې پلی کوونکی مؤسسې ولایتي مسؤولینو ګډون کړي وو.
د چارواکو په خبره یادو پروژو کې ۱۲ وړې ودانیزې پروژې، چې پکې د کانالونو کېندل، په اساسي او پاخه توګه جوړول، د ځمکې لاندې اوبو د مدیریت کولو او پیاوړتیا په پار د ۶۱ زره ٢٠٠ متر مکعب ترنچونو کېندل شامل دي.
د لوګر د کرنې او مالدارۍ رییس مولوی عبدالرؤف سعید د دغه شان پروژو پلي کول مهم وبلل زیاته یې کړه، هڅه کوی بې روزګاره او اړمنو خلکو ته د کار زمینه برابره کړي او د پروژو له پلي کوونکو یې وغوښتل، تر څو پلی کوونکو پروژو کې کیفیت ته پوره توجه وکړي.
باید وویل شي، چې د یادو پروژو  چارې به د درېیو میاشتو موده کې تکمیل او ګټې آخیستنې ته به وسپارل شي.