د کندهار دوو ولسوالیو کې لسګونه بڼوال وروزل شول
۴ تله ۱۴۰۳ه.ش
۲۲ رَبِیعُ الْأَوَّل ۱۴۴۶ه.ق
د کندهار دکرنې، اوبولګولو او مالدارۍ ریاست له خوا، په افغانستان کې د هالنډ کمېټې په همکارۍ ددې ولایت د پنجوايي او ژړۍ په ولسوالیو کې لسګونو بڼوالو ته روزنیز پروګرامونه په لاره واچول شول.
ددغو روزنیزو پروګرامونو په ترڅ کې یادو بڼوالو ته د بڼونو د غوره پالنې، بڼ جوړونې، د بڼونو د حاصلاتو ټولولو او د هزره وښو د مخنیوي په پار روزنه وکړل شوه.
له دغو پروګرامونو څخه برخمن شوي بڼوال خوښ دي، چې دکرنې ریاست له خوا دوی ته په بېلابېلو برخو کې عامه پوهاوی ورکول کېږي، چې ورسره د دوی د بڼونو او کروندې حاصلات ښه او اقتصادي ودې ته یې زمینه برابرېږي.
ددغو پروګرامونو د پلي کولو موخه د بڼوالو روزل، د بڼوالۍ سکټور ودې او پراختیا ته زمینه برابرول او په ټوله کې د بڼونو او ونو د ناروغیو او افتونو مخنیوی ښودل شوی دی.
