د ننګرهار بهسودو کې حيواني او نباتي درمل پلورنځیو څخه څارنه وشوه
۱۴ زمری ۱۴۰۳ه.ش
۲۹ مُحَرَّمُ الحَرام ۱۴۴۶ه.ق
د ننګرهار د کرنې، اوبولګولو او مالدارۍ رياست اړوند د بهسودو ولسوالی څارویو روغتیا او بوټو ساتنې مدیریتونو له لورې، ددې ولسوالی په مربوطاتو کې دحيواني او نباتي درمل پلورونکو هټيو څخه څارنه او کنټرول ترسره شوه.
د ننګرهار د کرنې، اوبولګولو او مالدارۍ ریاست تر چترلاندې بهسودو ولسوالی د ترویج مدیریت ګډ پلاوي د بهسودو ولسوالی په مختلفو کلیو کې یوشمېر حیواني او نباتي درملتونونه وڅارل.
دغه څارنه بزګرانو او مالدارانو ته د معیاري چوپړونو د وړاندې کولو په پار ترسره شوي دي.
په دغه څارنه کې د حیواني او نباتي درملتونونو څارنه، د بې کیفیته او تاریخ تېرو درملو تشخیص، د درملتونونو او وترنریو پاکوالۍ او د کرنې وزارت د قوانینو پر اساس د درملتونونو جوازونو څارل شامل دي.
د دغه کنټرول موخه د بې کيفيته او تاريخ تېرو درملو پلور مخنیوی، مالدار ته نسخې ورکول، په خپل سر د هټيو پرانیستلو مخنیوی او د غير قانونې درمل پلورولو مخنیوی دی.
دغه راز ددې څارنې په ترڅ کې یو اندازه تاریخ تېري درمل راټول شوي. ددې کنټرول په پايله کې يو شمېر هغه هټۍ چې د فعاليت جواز وخت يې تېر و او یایې جوازونه نه درلودل سپارښتنه ور ته وشوه، چې خپل جوازونه واخلي او یایي نوي کړي.
همدارنګه درمل پلورونکو ته سپارښتنې وشوې چې په راتلوونکې کې د غير معياري هټيو د پرانیستلو، د غیر مسلکي کسانو ګمارنې، د بې کيفيته درملو او واکسینو د پلور او واردولو څخه په کلکه ډډه وکړي.
دغه څارنې او ارزونې ددې لامل کېږي چې، درملتونونه او د وترنرۍ د برخې فعالین خپلو مشتریانو ته معیاري او په ښه کیفیت برابر چوپړتیاوې وړاندې کړي.
