ننګرهار کې بڼوالوته په سړو خونو کې دمحصولاتو ساتنې په برخه کې روزنه ورکړل شوه 

۳۰چنګاښ ۱۴۰۳ه‍.ش
۱۴ مُحَرَّمُ الحَرام ۱۴۴۶ه‍.ق
د ننګرهار د کرنې، اوبولګولو او مالدارۍ ریاست سره په همغږۍ د اکشن اېډ مؤسسې په تخنیکي همکارۍ او د ملګرو ملتونو پراختیایي ادارې په مالي لګښت د ننګرهار او لغمان ولایتونو 25 تنو بڼوالو ته په ننګرهار کې دمحصولاتو ساتنې، درجه بندۍ او نورو برخو کې روزنه ورکړل شوه.
د ننګرهار د کرنې، اوبولګولو او مالدارۍ رییس مولوي محمد ولي محسن وویل څو کاله وړاندې د کرنې د ودې او کلیوالي پراختیا پروژې له لارې په ننګرهار کې د سبو او مېوو ساتنې سړې خونې جوړې شوي وې، ترڅو بزګران او بڼوال پکي خپل تولید کړي محصولات د اصولو له مخې وساتي.
ښاغلي محسن زیاته کړه بزګرانو او بڼوالو ته ددې روزنې ورکولو موخه داده، ترڅو بزګران پوه شي، چې د محصولاتو  تولید په وخت کې خپل محصولات څنګه اوچیرته وساتي.
نوموړې وویل، چې د ننګرهار د لسو ولسوالیو چپرهار، خوږیاڼي، شېرزاد، کوټ، اچین، لعلپوره، مومندره، دره نور، رودات او سره رود ترڅنګ دلغمان ولایت دقرغیو او مهترلام څخه 25 تنو بڼوالو ته د محصولاتو راټولولو، ساتنې، پروسس، درجه بندۍ او نورو برخو کې روزنه ورکړل شوه.