ممپلیو کرکېلي ته د هلمندي بزګرانو لېوالتیا زیاته شوې
۱۳ چنګاښ ۱۴۰۳ه.ش
۲۶ ذیالحِجّة ۱۴۴۵ه.ق
دهلمند کرنې، اوبولګولو او مالدارۍ ریاست د احصایو او معلوماتو له مخې په دې ولایت کې د ممپلیو « ځمکنی بادامو » کروندې ډېرې شوي او د ممپلیو کرکېلي ته د هلمند د بزګرانو لېوالتیا هم زیاته شوې ده.
د هلمند خاوره اوبه او هوا د ممپلیو کرکېلي، پالنې او روزنې ته مناسبه ده، په همدې موخه ددې ولایت په مرکز لښکرګاه، نادعلي او یوشمېر نورو ولسوالیو کې د ممپلیو کرکېله زیاته شوې ده.
ممپلي، چې د کورني بازار تر څنګ په نړیواله کچه هم ښه بازار او مناسبه بیه لري په دې وروستیو کلونو کې په دې ولایت کې یې کرکېله مخ پر وده روانه ده.
دهلمند ولایت کرنې ریاست د ممپلیو ارزښت ته په کتو غواړي، چې په دې ولایت کې د ممپلیو کرکیله ترویج کړي، چې له یوې خوا د کوکنارو ښه بدیل دی او له بلې خوا د بزګرانو په اقتصادي وده کې هم رغنده رول لري، په همدې موخه بزګرو ته د ممپلیو د ښې روزنې او پالنې په برخه کې عامه پوهاوی ورکول کېږي او د ناروغیو مخنیوی په برخه کې ورته لازمې لارښوونې هم کېږي. ځمکنی بادام یا ممپلي هغه خوندور مغز دی، چې ډېر زیات مینه وال لري. ممپلي نه يوازې خوندور خوراکي توکي دي، بلکه ډیرې نورې ګټې هم لري. ممپلي د سرطان په مخنیوي کې ګټور خواړه دي، همداراز د هډوکو ځواکمنولو لپاره غوره مېوه ده. ممپلي اعصاب پیاوړي کوي او حافظه ښه کوي، ممپلي د سږو لپاره خورا ګټور دي، په دې کې داسې طبیعي منرالونه شتون لري، چې سږو ته قوت ورکوی، دغه مغزي محصولات د نورو مغزي محصولاتو په پرتله په نړۍ کې یو په درېیمه برخه کرل کېږي.
