کونړ کې پرسلګونو بڼوالو د بڼوالۍ اړونده توکي ووېشل شول

د کونړ ولایت د کرنې، اوبولګولو او مالدارۍ ریاست لخوا د ملګرو ملتونو پراختیایي ادارې په مالي او د امید مؤسسې په تخنیکي همکارۍ ددې لایت د خاص کونړ ولسوالی په «زوړ کونړ، تنر او ارازۍ» سیمو کې پر ۳۰۰ بڼوالو د بڼوالۍ اړونده توکي وېشلي دي.
ددې مرستې په ترڅ کې پر یادو بڼوالو د درمل شیندنې پمپ، د ښاخ برۍ قیچي، موزې، اره، بېلچه، کشۍ، رمبې، دست کشې او د حاصل ټولولو په موخه پلاستیکي سطل وېشل شوي دي.
ددغو مرستو د وېش موخه د بڼوالو ملاتړ او په دې ولایت کې د بڼوالۍ د محصولاتو معیاري کول دي.
له دغو توکو څخه برخمن شوي بڼوال د کرنې وزارت له هلوځلو څخه د مننې ترڅنګ ژمنه وکړه، چې د بڼوالۍ د حاصلاتو د زیاتوالي په پار به هلې ځلې ډېروي.