ننګرهار کې د چرګانو د دانې کیفیت ښه والي په موخه د همغږۍ ناسته ترسره شوه
د ننګرهار د کرنې، اوبولګولو او مالدارۍ رییس مولوي عبدالستار محمد په ننګرهار کې د چرګانو د دانې تولیدوونکو شرکتونو سره د دانې کیفیت ښه والي او پدې برخه کې د پانګونې زیاتوالي په موخه ناسته ترسره کړه.
په دې غونډه کې د ننګرهار د کرنې، اوبولګولو او مالدارۍ رییس مولوي عبدالستار محمد د دانې تولیدوونکو شرکتونو مسؤولینو ته د کرنې، اوبولګولو او مالدارۍ وزارت د نورمونو او کړنلارې مطابق د چرګانو د دانې د تولید سپارښتنه وکړه.
ښاغلي محمد مسؤلینو ته د دانې د کیفیت ښه والي، د باکیفیته خامو موادو واردولو، د هر تولیدوونکي شرکت له لورې پر بوجۍ د تولید تاریخ او نور مشخصاتو لیکلو، د خامو موادو د ګودامونه په معیاري شکل جوړولو، د تولید شوي دانې پروتیني موادو معیار برابرولو، د دانې په مناسب ځای کې ساتلو او ګڼو نورو برخو کې لازمې سپارښتنې وکړي.
په همدې حال کې د دانې تولیدوونکو شرکتونو مسؤلینو دننګرهار د کرنې، اوبولګولو او مالدارۍ رییس څخه د مننې ترڅنګ د کرنې وزارت له لورې ټاکل شویو معیارونو ته د دانې د برابرولو او کرنې ریاست د لارښوونو تعقیبولو هوډ څرګند کړل.
