نورستان کې د نیالګیو کېنولو کمپاین په ترڅ کې سلګونه هکټآره ځنګل او سلګونه جریبه بڼونه جوړېږي
۲۹۱۵ وری ۱۴۰۳ه.ش
۲۴ رَمَضانُ المُبارَک ۱۴۴۵ه.ق
د نورستان دکرنې، اوبولګولو او مالدارۍ ریاست د ملګروملتونو د خوړو اوکرنې ادارې په ګډه همکارۍ د ولایت په کچه د ۱۴۰۳ لمریز کال لپاره د بوټو او نیالګیو کېنولو کمپاین پیل کړی دی.
د دغه کمپاین پرمهال د نورستان مرستیال والي مولوی فیصل مختارد بوټو او نیالګیو پر کېنولو ساتنې او پالنې ټینګار وکړ له اړونده ادارو او ولسونو یې وغوښتل، چې د ولایت د زرغونتیا په موخه هوا او اقلیم ته په کتو سره نیالګي کېنوي او په پالنه کې یې خپل مسؤلیت ترسره کړي.
په همدې حال کې د نورستان دکرنې، اوبولګولو او مالدارۍ رییس مولوی سلیمان ایمن وویل، چې ددې کمپاین په ترڅ کې به د ملګرو ملتونو د خوړو او کرنې ادراې په همکارۍ ۲۸۰ زره مېوله لرونکي او بې مېوي نیالګي ولسونو سره په همغږۍ کېنول کېږي، چې ورسره به ۵۰۰ هکټاره نوي ځنګل او ۴۰۰ جریبه د مېوو بڼونه جوړ شي.
د یادونې وړ ده چې په دغه کمپاین کې د ملکي او نظامي ادارو مسؤلینو، قومي مشرانو، ښاریانو او ځوانانو ګډون کړي ؤ.
دا په داسې حال کې ده، چې دکرنې وزارت له خوا د ۱۴۰۳ کال د نیالګیو کښېنولو کمپاین پیل شوی، چې په ترڅ کې به یې د هېواد د زرغونتیا لپاره په میلیونونو نیالګي کښېنول شي.
