ختیځ زون کې پر یوشمېر مالدارانو د مالدارۍ د اصلاح بستې ووېشل شوې
۱۱ تله ۱۳۹۸
د کرنې، اوبولګولو او مالدارۍ وزارت د بڼوالۍ او مالدارۍ ملي برنامه «NHLP»د مالدارۍ د پراختیا او د مالدارو کورنیو دملاتړ په پار داځل د هېواد د ختیځ زون پر یوشمېر مالدارو کورنیو د مالدارۍ د اصلاح بستې ووېشل.
د کرنې وزارت د بڼوالۍ او مالدارۍ دملي برنامې چارواکي وایي، چې ددې برنامې له لارې د هېواد د ختیځ زون (ننګرهار، کونړ او نورستان) ولایتونو پر یوشمېر مالدارو کورنیو د مالدارۍ د اصلاح بستې «د غوجلو د اصلاح بستې» وېشل شوي دي.
په دغو بستو کې د غوجلو د اصلاح لپاره دوه کړکۍ، دوه هواکش نلونه او یو دواپاشي پمپ شامل دي، چې د ننګرهار ولایت په لسو ولسوالیو کې ۴۷۶ بستې، د کونړ ولایت په دوولسو ولسوالیو کې ۳۳۶ بستې او د نورستان ولایت په پنځو ولسولیو ۲۸۰ ووېشل شوې چې هر يوه مالدار ته يوه بسته ورکړل شوې ده.
د يادونې وړ ده، چې له دې سره به نه يوازې د څارويو د يو شمېر وژونکو ساري او غيرساري ناروغيو مخه ونيول شي بلکې د حيواني محصولاتو کميت او کيفيت دواړه به ورسره زيات شي.
