د خوست جوارسل څېړنیز فارم کې پر بېلابېلو بوټو څېړنې روانې دي
۱۵ وری ۱۴۰۳ه.ش
۲۴ رَمَضانُ المُبارَک ۱۴۴۵ه.ق
د خوست دکرنې، اوبولګولو او مالدارۍ ریاست چارواکي وايي، چې ددې ولایت دکرنې ریاست اړوندو فارمونو کې پر بېلابېلو بوټو څېړنې روانې دي، ترڅو ددې ولایت د خاورې اوبه اوهوا سره سم کرنیز تخمونه تولید او د بزګرانو په واک کې ورکړل شي.
د خوست دکرنې رییس مولوی محمد زمان عمري د خوست د جوارسل څېړنیز فارم څخه د لیدنې په ترڅ کې وویل، چې په دې څېړنیز فارم کې د غنمو ترڅنګ پر یوشمېر سبو څېړنې روانې دي.
ښاغلی عمري وویل، چې په دې څېړنیز فارم کې د رومیانو پر ۱۰ ډوله بزغلیو څېړنې بشپړ شوي دي، چې ډېر ژر به کروندګرو ته ور وپېژندل شي.
د کرنې، اوبولګولو او مالدارۍ وزارت د هېواد په کچه څېړنیز فارمونه جوړ کړي دي، ترڅو د هرې سیمې خاورې، اوبه او هوا سره سم کرنیز تخمونه او نیالګي تولید او د بزګرانو په واک کې ورکړي، ترڅو د بزګرانو د کرنیزو محصولاتو په زیاتېدو سره د دوی د عوایدو کچې لوړولو ته زمینه برابره او هېواد د کرنیزو محصولاتو په برخه کې ځان بسیاینې ته ورسېږي.
