لغمان کې د کرنې او مالدارۍ پراختیا په پار سکټوري غونډه دائره شوه
۲۹ کب ۱۴۰۲ه.ش
۹ رَمَضانُ المُبارَک ۱۴۴۵ه.ق
د لغمان دکرنې، اوبولګولو او مالدارۍ ریاست وایي، چې په دې ولایت کې د سکټوري اداراتو په شتون کې د ټولو هغو مؤسساتو چې دکرنې او مالدارۍ په برخه کې کار کوي د استازو په ګډون سکټوري غونډه دائره شوه.
دغه غونډه، چې د لغمان دکرنې رییس الحاج مولوی محمد ولي محسن په مشرۍ ترسره شوه، پکې د لغمان ولایت د یوشمېر سیمه ییزو ادارو چارواکو او د مؤسسو مسؤلينو ګډون کړی وو.
د غونډې په پیل کې د لغمان دکرنې رییس الحاج مولوی محمد ولي محسن د همکارو برنامو د تېرو کړنو د راپورونو او راتلونکو پلانونو له اوريدنې وروسته د همکارو برنامو له مسولينو وغوښتل، چې کرنې او مالدارۍ په برخه کې د مرستو جلبولو هڅه وکړي، همدا راز ښاغلي محسن زياته کړه چې خپلې راتلونکې پروژې د سکتوري رياستونو سره په همغږۍ په لوړ کيفيت سرته ورسوي.
ددې غونډې په ترڅ کې د لغمان دکرنې ریاست د پلان او برنامو د همغږۍ مدیر عبیدالله قریشي ددې ریاست د ۱۴۰۳ یم کال د پراختیایي پلان د منظورولو په موخه د یوشمېر پروژو د انتخاب او لومړيتوب ورکولو په موخه له ګډونوالو سره شریکې کړې، چې په ترڅ کې یې د سکتور مشر او د سکتوري ادارو په اتفاق راتلونکي 1403 کال لپاره پنځه پروژې، چې په کې د بادامو ۲۰۰ بڼونو جوړول، د کبانو ۵۰ فارمونه جوړول، د چهارمغزو ۱۰۰ کورني قوریې جوړول، ۵۰ شنې خونې جوړول او کرنیز څېړنیز فارم جوړول په کې شامل دي انتخاب شوي دي.
ورپسې د همکارو برنامو مسولينو په خپل وار سره د خپلو ترسره شويو کړنو مفصل راپور وړاندې کړ او خپل راتلونکي پلانونه يې د غونډې له ګډونوالو سره هم شريک کړل.
د غونډې په پای کې ښاغلي محسن د همکارو برنامو مسئولينو ته د پروژو د ښه تطبیق او ستونزو د حل په موخه لازمې لارښوونې هم وکړې.
