ننګرهار کې د لمریزې برېښنا په مرسته د اوبولګولو سیستمونو فعالولو لومړنۍ سروي پېلېږي
د افغانستان لپاره د دوامداره پرمختیا او څېړنې سازمان مسولینو د ننګرهار د کرنې، اوبولګولو او مالدارۍ رییس مولوي عبدالستار محمد سره دلمریزي برېښنا په مرسته د اوبولګولو سیستمونو فعالولو او کورونو روښانه کولو لپاره د برېښنا برابرولو په موخه د همغږۍ ناسته ترسره کړه.
د پروژې مسؤل محمد یاسین یار وویل دوی د ننګرهار لعلپوري ولسوالۍ په څلورو کلیو وړه لعلپوره، سربند، چکنور او ریني پرچاو کې د لمریزې برېښنا په مرسته د اوبولګولو سیستمونو فعالولو په پار لومړنۍ سروي ترسره کوي.
ښاغلي یار زیاته کړه په یادو کلیو کې د ځمکو کچه،اوبو اړتیا، خلکو د برېښنا اړتیامعلومولو، د لمریزې برېښنا لپاره د ځمکي ژمن لیک اخیستلو، د ځمکي فصلونو معلومولو، لمریزې برېښنا ترویجولو او عامه پوهاوی ترسره کولو په موخه سروی ترسره کوي.
نوموړی وویل ځمکو ته د اوبو رسولو سربېره د یادو کلیو خلکو ته د کورونو روښانه کولو او نورو اړتیاو د پوره کولو په پار برېښنا برابرولو لپاره هم سروې ترسره کوي.
د اوبو دبېړنۍ مرستو پروژه په هغو سیمو کې تطبیق کېږي، چې دسیندیزې حوزې څخه په لوړه ارتفاع کې پرتې وې.
د ننګرهار د کرنې،اوبولګولو او مالدارۍ رییس مولوي عبدالستار محمد د پروژې مسولینو ته د لازمو سپارښتنو ترڅنګ د هر راز همکارۍ ډاډ ورکړ.
