د لغمان دکرنې رییس: دکرنې ریاست په همکارۍ د کبانو ۴۰ فارمونه جوړ شوي دي
۲۲ کب ۱۴۰۲ه.ش
۲ رَمَضانُ المُبارَک ۱۴۴۵ه.ق
دلغمان د کرنې، اوبو لګولو اومالدارۍ رییس الحاج مولوي محمد ولي محسن په داسې حال کې، چې د مالدارۍ لوی مدیریت کارکونکو یې ملتیا کوله د دې ولایت د مرکز اړوند دشمټيو په سیمه کې د کبانو له تولیدي فارمونو څخه لیدنه وکړه.
ددې لیدنې په ترڅ کې د لغمان دکرنې رییس د یادو فارمونو د چارواکو ستونزې او وړاندیزونه واورېدل او د چارو د ښه والي په موخه یې لازمې لارښوونې وکړې.
ښاغلی محسن وویل: «د لغمان دمرکز په ګډون ددې ولایت په یوشمېر ولسوالیو کې د کرنې ریاست په همکارۍ او د ملګرو ملتونو د پراختیایي ادارې په مالي لګښت د کبانو ۴۰ فارمونه جوړ شوي دي.»
د لغمان دکرنې رییس وویل، چې هلې ځلې کوي ترڅو په دې ولایت کې د کب روزنې صنعت ته پراختیا ورکړي او د اړوندو مؤسسو له لارې د کب روزونکو ستونزو ته رسېدنه وکړي.
په همدې حال کې د کبانو فارم لرونکو د لغمان دکرنې رییس څخه مننه وکړه، چې د دوی ستونزې ته رسېدنه کوي او دکبانو د خوراکي توکو په برخه کې د مرستې غوښتنه وکړه، چې د لغمان دکرنې رییس له خوا ورته د همکارۍ ډاډ ورکړل شو.
