د ځمکو په تخنیکي او حقوقي برخو کې د دوو کمېټو له چارواکو سره د همغږۍ ناسته دائره شوه

۲۱ کب ۱۴۰۲ه‍.ش
۱ رَمَضانُ المُبارَک۱۴۴۵ه‍.ق
د اراضۍ ریاست د استملاک او بیا مېشتدنې لوی رییس او د دغه ادارې کفيل مولوي عبدالعلي عمري په مشرۍ د هغو کمېټو له چارواکو سره د همغږۍ غونډه دائره شوه، چې د هېواد په کچه د ټولو ځمکو د سروې او تصفیې په موخه په تخنیکي او حقوقي برخو کې په دندو بوخت دي.
یاده کمیټه چې د کرنې، اوبولګولو او مالدارۍ وزیر مولوی عطاءالله عمري د لارښوونۍ پر بنسټ جوړه شوې د ځمکو په دوو (تخنیکي او حقوقي) برخو کې خپل مسئولیت پر مخ وړي او په نږدې راتلونکي کې به د هېواد په کچه د ټولو ځمکو د سروې او تصفیې چارې پیل کړي.
د غونډې په پیل کې د کرنې، اوبولګولو او مالدارۍ وزارت د اراضۍ ریاست د استملاک او بیامېشتدنې لوی رییس د دواړو کمېټو له مسوولینو څخه د هغو د دندو، د یادې کمېټې د کارونو د پایلې او همدارنګه په هېواد کې د ځمکو د سروې او تصفیې چارو د پیل په اړه پوښتنې وکړې.
ورپسې د یادو کمېټو چارواکو په خپل وار د دغه ملي پروژې په ارزښت او همدارنګه د کار د پیل په اړه هم خبرې وکړې وویل: «موږ د دغه پروګرام لپاره د هېواد ټول زونونه په څو کټګورۍ وېشلي دي.په لومړۍ پړاو کې هغه ولایتونه چې سپینې ځمکې پکې زیاتې دي سروې کېږي.په دویم پړاو کې به هغه ولایتونه سروې شي، چې د ځمکو په برخه کې حقوقي سونزې پکې کمې وي او واړه ښارونه لري ځکه چې، په دغو ولایتونو کې د سروې چارې په آسانه توګه ترسره کېږي.او په درېیم پړاو کې به د لویو ښارونو د سروې او تصفیې چارې پیل شي.»

نوموړو زیاته کړه: «زموږ ټیمونه زیار باسي، چې دغه ملي پروژه په داسې ډول پیل شي چې هم هېوادوال پکې زیانمن نشي او هم امارتي (بیت المال) ځمکې خوندي شي ترڅو حق خپل حقدار ته په سمه توګه ورسېږي .»
په پای کې د اراضۍ ریاست سرپرست د دواړو کمېټو چارواکو ته لارښوونه وکړه تر څو خپل د کمېټو کارونه بشپړ او دغه ملي پروژه هرڅومره ژر چې ممکنه وي چارې يې پیل کړي.