د لغمان دکرنې رییس د ملګرو ملتونو پراختیایي ادارې له چارواکو سره وکتل
د لغمان دکرنې، اوبولګولو او مالدارۍ رییس الحاج مولوي محمدولي محسن د خپل کار په دفتر کې د ملګرو ملتونو پراختیایي ادارې د ابادۍ د برخې مسوول عدنان صافی او مل پلاوي سره په کتنه کې پر بېلابېلو موضوعاتو خبر اترې وکړې.
په دې کتنه کې د ملګرو ملتونو د پراختیایي ادارې د ابادۍ برخې مسوول عدنان صافی وویل، چې دوی غواړي د قرغه یې ولسوالی خیرو خېلو کې د بېرې کرکېله پیل کړي ښاغلی صافی وویل: «غواړو چې په دغه سیمه کې لمریزې برېښنا څخه په استفادې د سیند اوبو څخه د واټرپمپونو په زریعه ورته اوبه پورته کړو ترڅو دغه سیمه د بوټو په کرلو سره زرغونه شي. د يادې سیمې له ولسونو سره مو کتلي او ددې پروژې دفعالیتونو دهمغږۍ په موخه له تاسو سره معلومات شریک شو.»
په همدې حال کې د لغمان دکرنې، اوبولګولو او مالدارۍ رییس الحاج مولوی محمدولي محسن دوی ته د نوموړي پروژې د چارو په تطبیق کې د همکاریو ډاډ ورکړ محسن زیاته کړه چې د داسې پروژو په تطبیق سره به هغه سیمې چې ابادې شوي نه دي د بوټو په کرلو سره به زرغونې شي او دسیمې دښکلا او سیاحت سربېره به د شاتو مچیو روزونکو ته دکار زمینه برابره شي.
