کندهار کې دځمکې غصب مخنیوی او غصب شویو ځمکو بېرته راګرځولو په پار هڅې
٣٠ سلواغه ۱۴۰۲ه.ش
٨ شَعبان المُعَظّم ۱۴۴۵ه.ق
د کندهار دکرنې، اوبولګولو او مالدارۍ ریاست چارواکي وایي، چې په دې ولایت کې د غصب شویو ځمکو د بېرته راګرځولو په پآر یې هڅې کړندي کړي دي.
ددغو هلو ځلو په دوام ددې ولایت د امارتي ځمکو دغصب مخنیوی او غصب شویو ځمکو بېرته راګرځولو کمېټې یوشمېر غړي ارغنداب ولسوالی ته د سفر په ترڅ کې ددې ولسوالی له سیمه ییزو چارواکو سره د امارتي ځمکو دغصب مخنیوی او غصب شویو ځمکو بېرته راګرځولو په موخه خبرې وکړې.
په دې غونډه کې اړوندو چارواکو ته سپارښتنه وشوه، چې د خپل سرو تصرفاتو مخه دې ونیسي او هیچاته د امارتي ځمکو د پېر او پلور اجازه ورنکړي.
بلخوا ددې ولایت شاه ولیکوټ ولسوالی کې د امارتي ځمکې دغصب مخه هم نیول شوې ده.
د کندهار دکرنې ریاست چارواکي وایي، چې دکندهار ولایت هر ځای کې چې غېرمسوول اشخاص پراته دي، ټولوته مو له وړاندې د بېلابېلو لارو خبرتیاوي ورکړي چې د امارتي ځمکې پرېږدي، هغوی چې پرې کورونه او مېنې ابادې کړي د پلان سره سم به يې کورونه ړنګ او یادې سیمې به ترې تخلیه شي.
د یادونې ده، چې کندهار ولایت کې رزګونه جریبه ځمکه غصب شوي دي، چې تر دې دمه په دې ولایت کې زرګونه جریبه غصب شوي امارتي ځمکه بېرته را ګرځول شوي دي او دا کمپاین په چټکۍ سره روان دی.
