دکندز علي آباد کې د مالدار ورځ ولمانځل شوه

۲۹ سلواغه ۱۴۰۲ه‍.ش
۷ شَعبان المُعَظّم ۱۴۴۵ه‍.ق 
د کندز د کرنې، اوبولګولو او مالدارۍ ریاست سره  په همغږۍ د افغانستان لپاره د هالینډ کمیټي له لورې ددې ولایت دعلي آباد په ولسوالی کې د مالدار ورځ ولمانځل شوه.
په دې پروګرام کې، د علي آباد ولسوالی ولسوال مولوی عبدالقدیر«حمزه»، د کندز دکرنې، اوبولګولو او مالدارۍ ریاست د څارویو روغتیا او مالدارۍ امر داکتر نجیب الله حسن، د مالدارۍ په برخه کې د هالینډ کمیټي د کړنو ستاینه وکړه او دمالدارۍ محصولاتو، تولید کچي زیاتوالي، بازارموندنې، د څارویو روغتیا او ګڼو نورو برخو کې خبرې وکړې.
د علي آباد ولسوال مولوی عبدالقدیر «حمزه» د هالینډ کمیټي د تېرو کړنو ستاینه وکړه او  له مسولینو څخه د علي آباد ولسوالی کې د څارویو د مختلفو واکسینونو، ناروغیو مخنیوی، درملنې، وقایې، عامه پوهاوی او ګڼو نورو برخو کې د مرستو عوښتنه هم وکړه.
په همدې حال کې د هالینډ کمیټي ولایتي مسؤل په کندز کې د هالینډ کمیټي پر روانو کړنو،  واکسینونو،  چیجیو ضد درملو، خوراکي توکو زېرمتونونو، څارویو کلنیکونو تمویل او جوړولو خبرې وکړې.
نوموړی وویل د مالدار د ورځې لمانځل او د هالینډ کمیټې د فعالیتونو موخه د مالدارانو اقتصادي پیاوړتیا او د مالدارۍ سکتور ته پراختیا ورکول دي.
دغه راز دمالدار د ورځې لمانځې په مراسمو کې ددې ولایت مالدارانو پروسس شوي محصولات او توکي هم نندارې ته اېښودل شوې وه.