نادعلي ته د هلمند دکرنې رییس سفر
د هلمند ولایت د کرنې، اوبولګولو او مالدارۍ رییس مولوي نیازمحمد وهاج نادعلي ولسوالی ته د سفر په ترڅ کې ددې ولسوالی له سیمه ییزو چارواکو سره وکتل.
ښاغلی وهاج په یاده ولسوالی کې د امارتي ځمکو د غصب مخنیوی په اړه له مسؤلینو سره خبرې وکړې او له هغوی یې وغوښتل، ترڅو د امارتي ځمکو د غصب مخه ونیسي.
په ورته وخت کې د یادې ولسوالی مسؤلینو د هلمند دکرنې رییس ته ډاډ ورکړ چې د یادو املاکو د غصب څخه دساتنې په برخه کې به پوره همکاري کوي.
ددې ترڅنګ د هلمند دکرنې رییس په نادعلي ولسوالی کې د کرنې او مالدارۍ د ودې او پراختیا په برخه کې د مسؤلینو وړاندیزونه او ستونزې واوریدې او د حل په برخه کې یې ورته د اصولي کړنو ډاډ ورکړ.
بلخوا د هلمند دکرنې، اوبولګولو او مالدارۍ رییس الحاج مولوی نیاز محمد وهاج د مرکز لښکرګاه د زړې کلا سیمې له اوسیدونکو سره په کتنه کې د زړې کلا سمیه کې دکرنې ریاست د غصب شوې ځمکې په هکله خبرې وکړې.
