ننګرهار کې ۲۲ چکډمونه جوړېږي
د کرنې، اوبولګولو او مالدارۍ وزارت له خوا د ننګرهار په بېلابېلو ولسوالیو کې د سېلابونو د مخنیوي، د ځمکې لاندې اوبو د پیاوړتیا، د خاورې د تخریب او د رسوبي موادو د مدیریت په موخه د ۶۶ میلیونه افغانیو په لګښت د ۲۲ چکډمونه جوړېږي.
د ننګرهار والي حاجي ملا محمد نعيم اخند، په داسې حال کې چې د ننګرهار د کرنې رییس مولوي عبدالستار محمد، دکرنې وزارت د اوبولګولو رییس مولوي معاذ الله عادل، د کانال رییس مولوي غلام الرحمن کظيم، د ولايت وياند قاري قاضي ملا عادل او يو شمېر نورو مسئولينو یې ملتیا کوله د ننګرهار ولایت د کوټ په ولسوالی کې د يو چيکډيم د چارو په پرانیستې سره په ۲۲ ولسوالیو کې د چيکډيمونو چارې پيل کړې.
د ننګرهار کرنې رییس مولوي عبدالستار محمد وويل، چې د اميرالمؤمنين حفظه الله د ځانګړې لورينې له مخې د ننګرهار په کچه د چيکډيمونو د جوړولو لړۍ پيل شوه، چې په هرې ولسوالۍ کې به يو – يو چيکډيم جوړ شي.
نوموړي وويل، چې په ننګرهار کې د ملي بوديجې له مخې د ۶۶ ميليونه افغانيو په مالي لګښت د چيکډيمونو جوړولو چارې پيل شوې، چې د يوې مياشتې په موده کې به ګټې اخيستنې ته وسپارل شي.
هغه زياته کړه چې د کوټ ولسوالی د ميترانو سيمې چيکډيم د درې ميليونه افغانيو په مالي لګښت جوړېږي، چې ۲۸ متره پراخوالی، ۳۰ متره اوږدوالی،پنځه متره جګوالی او د ۱۸ زره متره مکعب اوبو زېرمه کولو ظرفيت لري چې پرمټ به يې ۵۰۰ جريبه ځمکه خړوبه شي، همدا راز به د ځمکې د سطحې اوبه زياتې او ور سره به چينې او کاريزونه تاند شي.
د يادو چکډمونو د رغنیزو چارو په پيل سره د ننګرهار ولایت لسګونو اوسېدونکو ته د لنډې مودې لپاره د کار زمينه هم برابرېږي.
