کندهار کې د موسمي اوبو مدیریت په پار ١٩ چکډمونه جوړېږي
١٠ سلواغه ۱۴۰۲ه.ش
١٨ رَجَب المُرَجَّب ۱۴۴۵ ه.ق
د کرنې، اوبولګولو او مالدارۍ وزارت له خوا د کندهار ولایت په ١٩ ولسوالیو کې د سېلابونو د مخنیوي، د ځمکې لاندې اوبو د پیاوړتیا، د خاورې د تخریب او د رسوبي موادو او اوبو د مدیریت په موخه ١٩ چکډمونه جوړېږي.
ددغو چکډمونو د جوړولو چارې د کندهار د کرنې، اوبولګولو او مالدارۍ رییس الحاج مولوي فضل الباري فضلي او یوشمېر نورو سیمه ییزو چارواکو په شتون کې د کښته شاولیکوټ ولسوالی د جرګې له سیمې څخه پیل شو.
د کندهار د کرنې رییس الحاج مولوي فضل الباري فضلي د یادو چکډمونو پر اهمیت خبرې وکړې او له خلکو څخه یې غوښتنه وکړه، چې د یادو چکډمونو په ساتلو کي پوره همکاري وکړي.
ښاغلي فضلي وویل، چې یاد چکډمونه به د اوبو د سطحې په لوړوالي کي ګټور تمام شي او تر ډېره حده به د یادې سیمې د اوبو ستونزې ورسره حل شي.
ټاکل شوې، چې د پاتو چکډمونو رغنیزې چارې په ډېر ژر پیل او زرګونه جریبه کرنیزه ځمکه به خړوبه کړي.
د يادو چکډمونو د رغنیزو چارو په پيل سره د کندهار ولایت د ١٩ ولسوالیو لسګونو اوسېدونکو ته د لنډې مودې لپاره د کار زمينه هم برابرېږي.
