هلمند کې د غنمو اصلاح شویو تخمونو له کرل شویو کښتونو څخه څارنه وشوه
٩ سلواغه ۱۴۰۲ه.ش
١٧ رَجَب المُرَجَّب ۱۴۴۵ ه.ق
د هلمند ولایت دکرنې، اوبولګولو اومالدارۍریاست لخوا، د اصلاح شویو تخمونو تصدیق ورکولو امریت د مسلکي مامورینو له لوري د بست اصلاح شویو تخمونو تولید شرکت له بنیادي او مورنيو کرل شویو کروندو څخه څارنه وشوه.
دغه څارنه د ناوې ولسوالی په بېلابېلو سیمو کې له شاوخوا ١١٧٤ جریبه کښتونو څخه ترسره شوه، چې د ښه تخم لاسته راوړلو لپاره یې بزګرانو ته لازمې لارښوونې وشوې.
دغه راز یاد پلاوی د اصلاح شویو تخمونو دولتي شرکت د غنمو له ٣٠٠ جریبه کروندو څخه هم لیدنه وکړه.
یاد شرکت هلمند کې د غنمو اصلاح شویو تخمونو ٣٠٠٠ جریبه ځمکه کې کرنه ترسره کړې ده چې د پلان له مخې د ټولو کرل شویو کروندو د څارنې او ارزونې چارې یې پیل شوي دي.
د هلمند دکرنې ریاست هلې ځلې کوي، چې بزګرانو ته د غنمو اصلاح شوي تخمونه چمتو او په دې برخه کې د دوی ستونزې هوارې کړي.
