د ننګرهار کانال شرکت د مالدارۍ فارم عصري کولو په پار هڅې
۱۸ مرغومې ۱۴۰۲ه.ش
۲۶ جُمَادَى الثاني ۱۴۴۵ ه.ق
د ننګرهار دکانال شرکت چارواکي وايي، چې ددې رياست اړوند د مالدارۍ فارم عصري کولو په پار هلې ځلې روانې دي او دوی ددې فارم څارویو ته جدي پاملرنه او شته ستونزې یې هواروي.
د ننګرهار کانال شرکت د مالدارۍ فارم آةر انجنیر سید فصیح الله هاشمي وویل، چې ددې فارم د څارویو د پېژندنې په پار د کانال شرکت د مالدارۍ فارم په شته څارويو ځانګړې شمېرې ولګول شوې، چې ورسره دڅارویو ثبت، ريکارډ ، نسب شجره، دشېدو توليدکچه، ارثي خواص او اقتصادي ارزښت په دايمي ډول معلومولې شو.
نوموړی وايي دغه ځانګړې شمېرې د فارمدارۍ په اصولو کې ځای لري، چې له امله يې د حېواناتو داقتصادي وضعيت، نسب ، ارثي او نورو جينټيکي خواص په اسانۍ سره معلومېدای شي.
ښاغلی هاشمي وايي د کانال شرکت د مالدارۍ فارم د مسلکي ډاکټرانو په ذريعه يې دغه شمېرې ولګولې، چې په تېر کې پدې فارم کې دغه طريقه نه وه کارول شوې.
اوسمهال په دغه فارم کې بېلابېل فعالیتونه روان دي، چې په کې څارویو ته، منظمه خوراک تهیه او نورې اړينې چارې شامل دي.
