ننګرهار کې ۵۲ وترنرانو ته د کانګو ناروغۍ په هکله روزنه ورکړل شوه

۱۶ مرغومې ۱۴۰۲ه‍.ش
۲۴ جُمَادَى الثاني ۱۴۴۵ ه‍.ق
د ننګرهار د کرنې، اوبولګولو او مالدارۍ ریاست سره په همغږۍ د ملګرو ملتونو د خوړو او کرنې ادارې له لورې د وترنرۍ ساحوي واحدونو ۵۲ وترنرانو ته روزنه ورکړل شوه.
د ننګرهار د کرنې، اوبولګولو او مالدارۍ رییس مولوي عبدالستار محمد وویل؛ داچې کانګو وینه بهیدونکي ناروغۍ یوه خطرناکه ناروغي ده چې د څارویو څخه انسانانو ته انتقالیږي، نو ددې ناروغۍ د مخنیوي روزنه مهمه وبلله او ددې لړۍ د غځولو غوښتنه وکړه.
نوموړي زیاته کړه په ولسوالېو کې د وترنرې سیمه ییزو واحدونو په شتون سره د مالدارۍ چوپړتیاوې زیاتي شوي او دا سکتور به ستاسي پرمټ په پښو ودرول شي.
همدارنګه د ننګرهار دکرنې رییس وترنر ډاکترانو ته د حفظ الصحي مراعت کولو، د امارت د قوانینو مطابق د کړنو ترسره کولو، بې کیفیته درملو، تقلبي استراګانو د نه استعمال او ساري ناروغیو د پیداکیدو پر وخت کرنې ریاست خبرولو  سپارښتنې وکړي او پخپله برخه کې د هر راز همکارۍ ډاډ ورکړ.
د ملګرو ملتونو د خوړو او کرنې ادارې د ختیځ زون د مالدارۍ برخي مسؤل وویل، چې دوی د جلال اباد ښار  او ۲۲ ولسوالېو ۵۲ ډاکترانو  ته د کانګو ویني بهیدونکي تبي ناروغۍ په برخه کې د مسلکي ډاکترانو په مرسته یوه ورځنۍ روزنه ورکړه.
نوموړي زیاته کړه وترنر ډاکتران ددې ناروغۍ د اخته کیدو د خطر سره ډیر مخ دي نو باید له ډیر احتیاط څخه کار واخلي. دوي هڅه کوي د وترنرۍ ساحوي کارکوونکو له لورې په ولسوالېو کې عامه پوهاوي ترسره او ځینو سیمو کې د څارویو غوجل او مارکیټونو کې د کنو ضد درملو شېندنه هم ترسره کړي.
ابراهیم خېل وویل د لسو ولسوالېو ۲۰ تنو ډاکترانو ته د درمل شېندلو پمپونه او د کنو د نمونو اخیستلو کڅوړې هم ورکړل شوي دي.
دا په داسې حال کې ده، چې څو ورځي وړاندې هم ۱۰۰ تنو قصابانو ته د کانګو وینه بهیدونکي تبي ناروغۍ په برخه کې هم روزنه ورکړل شوې وه.