د ځمکو چارو لوی رییس: په خپلو چارو کې رښتنولۍ، اخلاص او روڼتیا ته پام وکړئ

د کرنې، اوبولګولو او مالدارۍ وزارت د ځمکو چارو لوی رییس مولوی محمود مظلوم په مشرۍ ددې ریاست په مقام کې د غیر رسمي ښاري سیمو د ثبت ریاست رییس مولوی عبدالصمد پاڅون او ددغه ریاست له یوشمېر کارکوونکو سره په کتنه کې د کابل ولایت په بګرامۍ ولسوالی او د دغه ولايت په ۲۱ ناحیه کې د ملا تره خېل ښارګوټي د کورونو سروې په هکله خبرې اترې وشوې. 
په پيل کې د کرنې وزارت د ځمکو چارو ریاست لوی رییس مولوی محمود مظلوم د ملا تره خېل په ښارګوټي کې د سروې ټیمونو له زيار او کوښښ څخه مننه وکړه او ټولو ته يې لارښوونه وکړه تر څو په خپلو دندو کې له اخلاص، روڼتیا، رښتنولۍ او چارو کې له پوره چټکتیا څخه کار واخلي.
ددې غونډې په ترڅ کې دغه راز د غير رسمي ښاري سيمو د ثبت رییس مولوی عبدالصمد پاڅون د یاد ښارګوټي په هکله معلومات وړاندې کړل.
ښاغلی پاڅون وویل، چې ياد ښارګوټی چه په ۳۵۸۰۰ جريبه ځمکه باندې جوړه شوې ده، چې ۲۵۰۰۰ جريبه يې د کابل ولایت بګرامۍ ولسوالی او ۱۰۸۰۰ جريبه يې د دغه ولايت په ۲۱ ناحیې پورې اړوند دي، چې له تصفيې وروسته ټوله ځمکه امارتي تثبيت شوې ده. 
په همدې حال کې د غیر رسمي ښاري سيمو د ثبت ریاست يو شمېر کارکوونکو په سیمه کې د شته ستونزو په هکله خپل وړانديزونه د ځمکو چارو ریاست له مشرتابه سره شريک کړل.
د غونډې په وروستیو کې د کرنې وزارت د ځمکو چارو لوی رییس د غونډې ګډونوالو سره ژمنه وکړه، چې د دوی ستونزو او ننګونو ته به رسېدنه وکړي او دوی ته د هراړخیزې همکارۍ ډاډ هم ورکړ.